Lazio mori 3 pikë shumë të rënda me synimin Champions League ndaj Napolit të çudirave. Skuadra e bardhekaltrëve bëri një ndeshje perfekte nën drejtimin e Maurizio Sarri. Tekniku i cili vendosi një qasje më të kujdesshme dhe më pak sulmuese. Të pashmangshme në fund të lojës, pyetjet e gazetarëve, se cili është Napoli më i mirë i viteve të fundit. Por Sarri e ka dribluar përgjigjen me një metaforë prej një goleadori të vërtetë.
Mjaftoi një gol i Vecino për të vendosur ndeshjen në favor të Shqiponjave. Napoli, edhe për mungesë fati, nuk mundi më të rregullonte ndeshjen. E pas 9 fitoreve radhazi në kampionat, ra nën goditjet e ish-teknikut të tyre Sarri. Në fund të ndeshjes, në konferencën për shtyp, trajneri toskan theksoi meritat e skuadrës së tij: “Nuk është e vërtetë që kemi bërë një lojë në mbrojtje. Është Napoli që me lojën e tij të detyron të luash në 30 metrat e fundit. Me llogari të bëra ne bëmë më shumë goditje në portë”.
METAFORA E TEKNIKUT SARRI MBI FEMRAT
Trajneri i bardhekaltërve nuk harron të shkuarën e tij në Campania ku lindi sarrizmi: “Kam lënë diçka në këtë qytet, edhe pse nuk kemi dalë me fitoren përfundimtare. Nuk kam revanshe për të marrë. Janë tre pikë të rëndësishme sepse fituam me skuadrën më të fortë në kampionat. Për asgjë tjetër". Mirëpo, kur gazetarët e pyetën nëse Napoli i tij apo ky ishte më i fortë, ai përgjigjet si një goleador i vërtetë: “Nuk është se nëse të pëlqejnë bjondet dhe kalon një brune e bukur, e thua se është e shëmtuar. Janë dy bukuri të ndryshme. E kam zili Spallettin, i cili, së bashku me klubin dhe drejtorin sportiv, kanë pasur guximin të bëjnë gjëra që asnjë klub tjetër nuk do t'i bënte".
