Rodrigo Bentancur pothuajse me siguri do të humbasë ndeshjen kundër Milan të martën. Një tjetër mungesë e rëndë për Tottenham për ndeshjen e parë të raundit të 1/8 të Ligës së Kampionëve. Mesfushori uruguaian ka pësuar një dëmtim në gjurin e majtë, që nuk e bën aspak optimist teknikun Antonio Conte. Ish-lojtari i Juventus ishte protagonist i një përplasjeje loje në minutën e 65' të ndeshjes së humbur kundër Leicester. Kontrasti me Mendy bëri që gjuri të përdridhej në mënyrë të panatyrshme dhe 25-vjeçari u rrëzua përtokë duke bërtitur nga dhimbjet.
Bentancur arriti të largohej nga fusha me këmbët e tij, por duke çaluar dukshëm. Kontrollet në orët e ardhshme do të qartësojnë padyshim shkallën e problemit dhe për rrjedhojë edhe kohët e rikuperimit. E megjithatë, mungesa e tij më 14 shkurt në San Siro duket e qartë. Një problem më shumë për Antonio Conte, i cili ka humbur edhe kapitenin Lloris dhe Bissoum, përveç Hojberg të pezulluar.
Lexo më tej: Video/ Arsenal gabon përsëri, Brentford i jep asist City: ndalet edhe Chelsea, Leicester shpartallon Conte
Sidoqoftë, në këtë pikë as Stefano Pioli nuk po buzëqesh. Në funksion të Champions League, Milan po përpiqet të rikuperojë Tomori dhe Bennacer e ndoshta edhe Florenzi. Ndërsa Maignan do të jetë ende i padisponueshëm. Jashtë listës së UEFA-s mbetën edhe Ibrahimovic dhe Dest.
