Një arbitre e re mbeti e mbyllur brenda stadiumit, pasi pezulloi një ndeshje për të rinjtë, për shkak të një sherri. Episodi i pakëndshëm ka ndodhur në provincën e Brescias në Itali, në ndeshjen mes Darfo Boarios dhe Carpenedolo. Takimi u pezullua pas sherrit ku u përfshinë disa drejtues dhe disa lojtarë të dy skuadrave. Sipas raportit, fluturan shkelmat dhe grushtet para vendimit të arbitres për të ndërprerë ndeshjen. Arbitrja u kthye e përlotur në dhomat e zhveshjes, e rrethuar nga dy skuadrat. Megjithatë, më e keqja ndodhi në momentin që do të dilte nga impianti. Arbitrja, atë cast, zbuloi se ishte mbyllur brenda dhe braktisur aty.
“Kur donte të dilte nga dhoma e zhveshjes – lexohet në njoftimin për shtyp nga Liga Kombëtare e Amatorëve – ajo kuptoi se ishte braktisur dhe mbyllur brenda impiantit”.
Nuk munguan sanksionet për dy klubet dhe protagonistët e sherrit që sollën vendimin për pezullimin e ndeshjes. Dy skuadrave iu dha nga një humbje në tavolinë, të dyja përgjegjëse për moszhvillimin e ndeshjes. Dy persona u identifikuan dhe u skualifikuan deri më 22 mars. Carpenedolo u gjobit me 200 euro kundrejt 300 euro që ishte gjoba për Darfo Boario. Diferenca ishte për shkak të rrethanave rënduese të ndihmës së papërshtatshme për arbitren në fund të ndeshjes.
