Java e 21 e Superiores do të luhet në tre ditë, me sfida shumë të rëndësishme për klasifikimin. Dy janë ndeshjet që do të ngrenë siparin e javës në orën 13.00. Kukësi do të presë në shtëpi Kastriotin e Laçi, me shpresën për të bërë tre fitore radhazi, Egnatian. Klasikja e kreut të renditjes do të luhet në Shkodër, mes Tiranës e Vlaznisë, edhe pse kalendari e kishte programuar në kryeqytet. Dy skuadrat shkëmbyen radhën në fazën e dytë dhe tani dy klasiket e fundit do të luhen në Loro Borici. E mbyll javën Partizani të hënën, në shtëpinë e skuadrës 'ters', Bylis.
Kukësi i teknikut Hallaçi e di se do të jetë një ndeshje e vështirë me Kastriotin. Një përplasje direkte ku askush nuk do të tërhiqet prapa. Blutë kanë avantazhin e ndeshjes në shtëpi dhe duan të përfitojnë nga momenti i vështirë i krutanëve. Pas tre fitoreve radhazi mes kampionatit e Kupës, Kukësi pësoi humbjen përballë Vllaznisë e tani kërkon 3 pikët. Kastrioti nuk fiton prej pesë ndeshjesh, por barazimi me Erzenin i ka dhënë zemër. Laçi i Gentian Mezanit kërkon fitoren e tretë radhazi në kampionat, por përballë është Egnatia. Rrogozhinasit vijnë nga pesë ndeshje pa fitore, katër nga të cilat në kampionat. Tetova e ka të qartë se një tjetër rezultat negativ do të largojë edhe më shumë nga objektivi Europë.
TË DIELËN
Derbi mes Erzenit e Teutës rikthehet edhe në kampionat, pas në Kupë pa fitues durrsakët. Me një barazim e një fitore minimale, skuadra e Martinit e nxorri jashtë Erzenin. E megjithatë renditja e Teutës është shumë e vështirë, +2 nga zona e rënies. Shijakasit e Kapllanit në anën tjetër, duan përrallën. Të katërtët, -2 nga vendi i dytë, Erzeni do të mundohet të vazhdojë sezonin spektakolar deri tani. Klasikja në Shkodër, vendos shumë për luftën për titull. Tirana ka gjashtë pikë avantazh ndaj Vllaznisë, që luan në shtëpi. Një fitore do ta ngushtonte diferencën mes dy skuadrave në tre pikë. Pa harruar se edhe Klasikja e fazës së fundit është për tu luajtur po në Shkodër.
MBYLLET JAVA
Të hënën, javën e mbyll ndeshja në Ballsh. Shensoi pa nga tribuna humbjen e parë të Bylis, pas dy fitoreve në debutim. Tani mallakastriotët do të luajnë kundër Partizanit, që rrezikon të zbresë deri në vendin e pestë. Bylis është një skuadër që nuk i sjell kujtime të mira të kuqve e për më tepër Adush Muça është një fushë që i sjell ters.
SUPERIORE, JAVA E XXI
11/02/2023
KUKËSI 13:00 KASTRIOTI
LAÇI 13:00 EGNATIA
12/02/2023
ERZENI 16:00 TEUTA
TIRANA 16:00 VLLAZNIA
13/02/2023
BYLIS 13:00 PARTIZANI
