“Sot nuk funksionoi absolutisht asgjë. Nuk e kuptoj pse u ul poshtë ekipi dhe i krijoi ato raste Egnatias". Ardian Mema është shtangur nga humbja me përmbysje. E për më tepër nga një kundërshtar me një lojtar më pak, kur Kastrioti ishte në avantazh. Tekniku i Kastriotit, pas fitores në debutim, ka provuar edhe humbjen e parë. Mema ka shpjeguar situatën e komplikuar të Kastriotit dhe dëmtimeve që e kanë penalizuar. "Nuk e kam pasur grupin e plotë gjatë kësaj periudhe, dy lojtarë i kisha në Serbi për rikuperim. Hasani ka qenë me brinjë të krisur, ka luajtur i sforcuar. Kam pasur lojtarë shumë të sëmurë si Hasani e Karakaçi dhe që mezi kanë bërë një seancë stërvitore. Nuk është se ngushëllohem me këtë pjesë, por do të shoh në vazhdimësi se kemi 21 ditë kohë. Kemi disa probleme imediate që duhet të riparohen".
Tekniku e shtoi dozën e pakënaqësisë, duke lajmëruar se mund të rishohë pozicionin e tij. "Gjendja ka qenë për një ekip të sëmurë, nuk kam pasur grupin gjatë gjithë kohës. Se si do të vazhdohet me ekipin është gjë tjetër. Edhe ndaj Vllaznisë nuk thashë fitova unë, po fitoi ekipi. Sot është 50 me 50. Kjo duhet bërë analizë e diskutuar me ekipin se si janë gjerat në thellësi”, tha Mema në fund të sfidës.
EGNATIA I BËN PRESION KRYESUESVE
Nuk mund të mos ishte entuziast Shpëtim Duro, pas fitores 2-3 ndaj Kastriotit. Tani rrogozhinasit kanë vetëm një pikë më pak se Tirana e vendit të dytë. “Shpresojmë të arrijmë objektivat, jemi një situatë të mirë. E kam marrë ekipin në vendet e fundit dhe sot është ndër tre më të mirat. Skuadra më ka pëlqyer 30 minutat e para, shënuam dhe kaluam në avantazh por më pas u ndëshkuam. Në pjesën e dytë ishim me 10 lojtarë, më gëzojnë 3 pikët por më shqetësojnë 2 golat e pësuar”, u shpreh Duro.
