Një në vendin e tretë dhe tjetri në të shtatin, por mes tyre janë vetëm tre pikë diferencë. Kjo e bën delikate përballjen mes Kastriotit dhe Egnatias, edhe në dritën e zhvillimeve të javëve të fundit. Ardhja e Ardian Memës ka sjellë edhe ndryshimin e kursit në Krujë, ku pas tre razultatësh pa fitore, rrëmbeu suksesin 1-0 me Vllazninë. Karakaçi e Hasani janë problemi më i madh për teknikun, nëse nuk rikuperohen.
Sigurisht që problemet nuk kapërcehen me tre pikë dhe madje Mema i konstatoi pas ndeshjes. Më shqetësuese është situata me dëmtimet dhe kondicionin fizik të disa lojtarëve, për më tepër kryesorë. Kështu, mënyrën e përballjes me Egnatian për teknikun Mema e mban pezull gjendja e Edon Hasanit dhe Abaz Karakaçi. Të dy janë në garë me kohën për të rikuperuar, por fjala e fundit i takon stafit mjekësor. Mema do të donte shumë t’i kishte gati për ndeshjen, por shpresat i ka varur te fizioterapia. Lajmi i mirë është rikthimi pas dy muajsh i Silvio Zogajt. Sulmuesi anësor luajti 15 minutat e para pas dëmtimit në gju, duke shënuar edhe golin që vendosi ndeshjen, por është e pamundur të mendohet si alternativë nga minuta e parë.
SI VJEN EGNATIA
Në Kamëz mbërrin Egnatia, e plagosur nga humbja në Rrogozhinë me Bylis dhe plot dëshirë për të përmirësuar statistikat e Shpëtim Duros në pankinë. Katër fitore e dy humbje në 6 ndeshje me teknikun në pankinë, por ndërkohë precedentët e 5 sezoneve të fundit nxjerrin përpara Kastriotin, që ka fituar 6 nga 11 precedentët, me një ndeshje që është mbyllur në barazim. Të besuarit e Duros janë të tretët me 21 pikë dhe kanë sytë nga derbi kryeqytetas për të ngushtuar distancën. Por më parë duhet të mposhtin Kastriotin, që është vetëm tre pikë larg si nga Egnatia e zonës europiane, ashtu edhe nga zona playout e Bylis.
