Salt Bae i hodhi kripë Kupës së Botës, shpërthen Giuseppe Rossi: “Doje vëmendjen e Kupës! Po kush ka*in je?”

Një nga imazhet më të sikletshme të pas-finales botërore të fituar nga Argjentina, ishte padyshim ajo që pa sipërmarrësin e njohur Salt Bae duke u përpjekur në çdo mënyrë të bënte foto me Kupën dhe Messin. Lionel gjithashtu u shfaq shumë i acaruar nga këmbëngulja e turkut. Të shumtë ishin ata që pyetën përse ai personazh ishte në mes të fushës në kohën e festimeve të Albiceleste. Apo përse kishte ai nderin të mbante në duar trofeun e lakmuar. Ndjesia e “urrejtjes” ndaj Salt Bae u shpreh qartë nga Giuseppe Rossi, me një postim në Twitter. Salt Bae, me emrin Nusret Gökçe, është një sipërmarrës turk që zotëron restorante të ndryshme. Pasurinë e tij ai ia detyron rrjeteve sociale, ku ka krijuar një personazh të famshëm. Mbi të gjitha për mënyrën e veçantë se si ai kripos mishin. Shumë futbollistë dhe personazhe të njohur frekuentojnë ambientet e tij, ndërsa me të është në kontakt të ngushtë edhe presidenti i FIFA-s, Gianni Infantino. Por e gjithë kjo nuk e justifikon faktin pse turku ishte mes lojtarëve të Argjentinës e madje pati kënaqësinë të mbante në dorë Kupën për ndonjë foto. Incidenti bëri që shumë të rrudhnin frytyrën, por ai që nuk duroi ishte Giuseppe Rossi…

POSTIMI I ASHPËR KUNDËR NUSRET

#SaltBae can kiss my ass. Wanting all that attention and touching the cup. Who da fuq are you bro? You’re 2 minutes of fame are up. Next.

— GIUSEPPE ROSSI (@GiuseppeRossi22) December 21, 2022

Ish-sulmuesi mes të tjerëve i Villarreal, Fiorentina dhe Parma, dukej shumë i mërzitur nga ndërhyrja e Salt Bae dhe tentativa e tij e sforcuar për të reklamuar veten me çdo kusht. Në Twitter ai u lëshua kundër sipërmarrësit turk: “Salt Bae mund të më puthë by*hën, me dëshirën për të patur gjithë vëmendjen e prekur Kupën. Kush ka*in je ti vëlla? Dy minutat e tua të famës mbaruan. Hajde tjetri”, ka shkruar qendërsulmuesi italo-amerikan. Një postim i fortë, por që mori miratimin unanim nga të gjithë përdoruesit. "Bravo Pepito, i ashpër por i drejtë", siç komentoi dikush.