Një ngjarje e rëndë ka ndodhur mbrëmjen e së shtunës në vendin e quajtur Ura e Gjolës në afërsi të Fushë Krujës. Ambulanca e qendrës shëndetësore ka marrë aty kuzhinierin e njohur, Indrit Çela i cili kishte lëndime të shumta.
Sipas asaj që raporton News 24, 39-vjeçari u ka thënë punonjësve të policisë dhe stafit mjekësor të kësaj qendre se ishte përfshirë në aksident me një automjet i cili është larguar nga vendngjarja. Të njëjtat burime shtojnë se ky version nuk i ka bindur efektivët e policisë të cilët dyshojnë se Çela ishte dhunuar.
Kjo pasi ai kishte dëmtime në kokë e fytyrë. Edhe “JOQ Albania” ka publikuar dhe disa fragmente të rrahjes brutale që disa të rinj i bëjnë kuzhinierit. Ngjarja ka ndodhur mbi urë në aksin Fushë Krujë – Rinas – Vorë. Sipas këtij portali sherri kishte nisur për shkak të një debati se kush kishte përparësinë në rrugë. ©LAPSI.al
