Sekretari amerikan i shtetit Antony Blinken ka njoftuar se ka anuluar takimin me ministrin e Jashtëm të Rusisë, Sergei Lavrov, takim ky i paraparë të mbahej të enjten.
Blinken tha se pas ngjarjeve të 24 orëve të fundit më nuk ka kuptim të mbahet ky takim dhe se e ka njoftuar Lavrovin për këtë.
“Tani që po shohim se pushtimi i Ukrainës nga Rusia ka nisur dhe Rusia ka bërë të qartë refuzimin e diplomacisë, nuk ka kuptim të shkohet para me këtë takim”, - ka thënë Blinken në konferencë për media pas takimit me ministrin e Jashtëm të Ukrainës, Dmytro Kuleba.
Blinken i sheh shqetësuese deklarimet e presidentit të Rusisë, Vladimir Putin.
“Putin me deklaratat e tij sot ia ka bërë të qartë botës se si e sheh Ukrainën, jo si shtet të pavarur, por si krijim të Rusisë”, - tha Blinken.
Ai tha se Putin me veprimet e tij ka shkelur një mori marrëveshjesh ndërkombëtare ndërsa shtoi se Evropa është në rrezikun më të madh që nga Lufta e Dytë Botërore.
Blinken tha se Putin me sjelljet e tij do të rikrijojë Perandorinë Ruse apo të krijojë sferën e ndikimit.
“Çështja e Ukrainës në NATO ishte thjeshtë pretekst për të maskuar faktin që ka të bëjë me vetë pikëpamjen e Putinit për Ukrainën, që nuk e sheh atë si shtet të pavarur”, - u shpreh Blinken. ©LAPSI.al
