Armando Fezga, Flora Ndreca dhe Muhir Mezini janë 3 kontrollorët e aeroportit të Rinasit të cilëve u është komunikuar masa e arrestit në ambientet e drejtorisë së Policisë së Tiranës, nga ku mbahen prej 12 orësh. Ndaj tyre është ngritur akuza e shpërdorimit të detyrës. Këta persona dyshohet se janë organizatorë të situatës në Albcontroll, ku të gjithë kontrollorët njëzëri shpallën paaftësinë e përkohshme për punë.
Avokati i kontrollorëve të trafikut ajrorë, Rezart Kthupi, përmes një prononcimi për mediat më herët tha se akuza për shpërdorim detyre nuk qëndron, pasi kjo akuzë vlen për administratën publike dhe jo për një sh.a. që nuk varet nga shteti. Në një njoftim të dhënë më parë nga Organizata Ndërkombëtare e Aviacionit Civil (ICAO), Aeroporti i Rinasit do të qëndrojë i mbyllur të paktën deri në orën 15 të pasdites së sotme.
