Vaksinat e reja COVID-19 nga Pfizer dhe Moderna duket se kanë dhënë efekte të mira në parandalimin e sëmundjes. Por, është ende e paqartë se sa ato mund të frenojnë përhapjen e coronavirusit. Kjo sepse nga një analizë me dozat e Pfizer dhe Moderna u panë se disa njerëz të vaksinuar u sëmurën me COVID-19.
Kjo lë të hapur mundësinë që njerëz të vaksinuar të mund të infektohen pa shfaqur simptoma dhe më pas mund të transmetojnë në heshtje virusin veçanërisht nëse bien në kontakt të ngushtë me të tjerë ose nuk mbajnë më maska.
Nëse njerëzit e vaksinuar janë përhapës të heshtur të virusit, ata mund të vënë në rrezik njerëzit e pa vaksinuar, shkruan The New York Times.
“Shumë njerëz po mendojnë se sapo të vaksinohen, nuk do të duhet të mbajnë më maska”, - tha Michal Tal, një imunolog në Universitetin e Stanfordit. “Do të jetë me të vërtetë kritike që ata të dinë nëse duhet të mbajnë maska, sepse ata mund të jenë ende infektues”.
Në shumicën e infeksioneve të frymëmarrjes, përfshirë coronavirusin e ri, hunda është porta kryesore e hyrjes. Virusi shumëzohet me shpejtësi atje, duke tronditur sistemin imunitar për të prodhuar një lloj antitrupash që janë specifikë për mukozën, indin e lagësht që mban hundën, gojën, mushkëritë dhe stomakun.
Nëse i njëjti person është i ekspozuar ndaj virusit për herë të dytë, ata antitrupa, si dhe qelizat imune që mbajnë mend virusin, mbyllin me shpejtësi virusin në hundë përpara se të ketë një shans për tu kapur diku tjetër në trup.
Vaksinat e coronavirusit injektohen thellë në muskuj dhe stimulojnë sistemin imunitar për të prodhuar antitrupa. Kjo duket të jetë mbrojtje e mjaftueshme për të mbajtur personin e vaksinuar të mos sëmuret.
