Shoqatat e biznesit u bashkuan kundër ligjit për strehimin social, i cili detyron ndërtuesit që të japin tre përqind të sipërfaqes së objekteve të reja që do të ndërtohen për qëllime strehimi.
“Ne mendojmë që jo vetëm është taksë e padrejtë dhe antikushteutese, po penalizon rëndë dhe jam i bindur që do kalojë në stanjacion të përhershëm industrinë e ndërtimit në Shqipëri”, - tha Nikolin Jaka.
Luan Bregasi i Biznes Albania nuk mund të jetë vetëm sektori i ndërtimit që të përballojë politikat e strehimit. Sipas tij qeveria mund të përdorë paratë e koncesioneve.
“Koncesioni i pullave fiskale është e ardhur gati 20 milionë euro në vit, koncesioni i skanimit, i ngjyrimit të karburantit dhe shumë të tjera, të cilat shteti i ka dhënë kompanive private, pra është pjesë e tyre. Shumë mirë me ligj mund të thotë që 10%, se 3% është pak, dhe 10% tu vësh të të ardhurës që kalojnë nga taksat tona për fond për njerëzit në nevojë, Absolutisht jemi dakord. Ata mund të paguajnë pasi janë koncesione që janë dhuruar”, - tha Luan Bregasi.
Ndërtuesit përsëritën se qeveria nuk është konsultuar me ta për ligjin e strehimit social, ndërkohë që ky i fundit ka hyrë në fuqi vetëm dy ditë më parë.
