Partia Socialiste bën çmos për të larguar vëmendjen nga dosja e ish-ministrit të Brendshëm, Saimir Tahiri, i cili përveç dosjes ‘Habilaj’ është në telashe edhe pas arrestimit të Orest Sotës, në makinën e të cilit u gjendën patentat e tij dhe shuma prej 863 mijë eurosh.
Sot Sekretari i Përgjithshëm i Partisë Socialiste, Taulant Balla akuzoi prokurorinë se po përpiqet të mbyllë dosjen CEZ pa kryer asnjë hetim dhe pa konsideruar asnjë nga gjetjet e raportit përfundimtar të Komisionit Hetimor Parlamentar. Risjellja në vëmendje e kësaj çështje pikërisht në këtë moment, nuk është krej e rastësishme, ndërkohë për muaj më radhë ishte ‘harruar’.
Sot PS kërkon të largoojë vëmendjen e opinionit publik nga akuzat që rëndojnë qeverinë për lidhje me drogën dhe krimin dhe dosja e ish-ministrit të Brendshëm. Balla dënoi veprimin e prokurorisë që, sipas tij, ka dërguar dosjen në gjykatë duke kërkuar mbylljen e saj, duke neglizhuar një dokument që, sipas Ballës, ka brenda tij emra “peshqish të mëdhenj e të vegjël, të dyshuar për krim ekonomik”. Sipas tij, prokuroria po shfaqet hapur si vegël e politikës, por se nuk do ta ndalojë dot orën e drejtësisë që ka tmerruar politikanët, prokurorët dhe gjykatësit e korruptuar.
©LAPSI.al
