Gjykata e lartë ka rrëzuar rekursin e Mario Çelës, vëllai i të shumëkërkuarit Suel Çela, dhe Sergei Hasanpapaj, për masën e arrestit me burg.
Vendimi është marrë në dhomë këshillimi nga treshja gjykuese Ilir Panda, Albana Boksi dhe Genti Shala. Ata u estraduan pak muaj me parë nga Belgjika ku ishin arrestuar me kërkesë të SPAK .
Mario Çela dyshohet për veprat penale “Vrasja me paramendim”, ”Organizata kriminale”, ”Mbajtja pa leje dhe prodhimi i armëve, armëve shpërthyese dhe municionit” dhe ”Korrupsioni aktiv ne sektorin privat”.
Gjithashtu, edhe Sergej Hasanpapaj akuzohet nga SPAK për disa vepra të rënda penale dhe veçanërisht, si autor i dyshuar i vrasjes së shtetasit Bledar Muça në Belgjikë. 32 vjeçari, konkretisht akuzohet për veprat penale “Vrasja me paramendim”, mbetur në tentativë dhe kryer në kuadër të organizatës kriminale, dhe “Mbajtja pa leje dhe prodhimi i armëve, armëve shpërthyese dhe i municionit”.
