Përpara godinës së GJKKO-së po mbahet protestë, pasi sot zhvillohet seanca për masat e sigurisë për protestuesit e arrestuar. Qytetarët kanë thirrur në kor “Rama në burg, protestuesit të lirë”, “Protestuesit nuk janë vetëm” etj.
Qytetarët u shprehën se Rama duhet të largohet sa më parë nga pushteti, duhet të bëhen dhe ndryshime në Kushtetutë.
"Jam në protestë, sepse e shoh të padrejtë arrestimin e aktivistëve. Unë kam dalë thuajse përditë dhe jam penduar për ditët që nuk kam dalë. Besoj se sistemi do ndryshojë. Ndryshimi do të ndodhë, jam shumë i sigurt. Më 7 shtator do ketë masivitet. Do ketë masivitet, sepse nuk ka tavolinë që nuk flet për këtë protestë. Qytetarët kanë kuptuar se shumica është fiktive dhe përmes shumicës fiktive duan të jenë në qeveri.
Ky revolucion është një ngritje e shoqërisë dhe efektet i ka dhënë. Duhet të ikë Rama sa më parë, më pas të ketë ndryshime në Kushtetutë, që vendi të qeveriset në mënyrë demokratike. Ligji për mbrojtjen e zonave të mbrojtura duhet të ndryshojë. Qeveria duhet të kuptojë se mbrojtja e natyrës është një e drejtë themelore. Kjo, sepse është një vend, që ka degraduar nga ana e natyrës. Shtatori do shkundë këtë pushtet të inkriminuar", tha një protestues.
