Protestuesit kanë vijuar edhe sot të përdorin forma simbolike kundër kryeministrit dhe qeverisë. Gjatë tubimit u shfaq një video satirike ku personazhi i krijuar me inteligjencë artificiale, “Diella”, e prezantuar si ministrja e Inteligjencës Artificiale, shpall dorëheqjen e saj dhe i bën thirrje kryeministrit Edi Rama të ndjekë të njëjtin shembull.
Në videon e transmetuar dëgjohet mesazhi: “Për shkak të skandalit të Zvërnecit deklaroj dorëheqjen time të parevokueshme nga qeveria shqiptare. Radha juaj, kryeministër.”
Paralelisht, protestuesit kanë vendosur në muret pranë shkallëve të Kryeministrisë disa fletë me emrat e çështjeve që ata i konsiderojnë si skandale të qeverisë. Mes tyre përmenden koncesionet e inceneratorëve, check-up në shëndetësi, dosja “Tahiri”, shembja e Teatrit Kombëtar, vrasja e Klodian Rashës, si dhe çështje të tjera që, sipas organizatorëve, simbolizojnë arsyet e protestës së tyre.
