Shqipëria dhe Maqedonia e Veriut kanë arritur një marrëveshje për zbatimin e sistemit "One Stop", i cili synon të lehtësojë kalimin ndërkufitar të qytetarëve dhe mallrave mes dy vendeve. Me këtë sistem, udhëtarët do t’i nënshtrohen vetëm një kontrolli në pikat kufitare, duke reduktuar kohën e pritjes.
Zbatimi i marrëveshjes pritet të nisë brenda këtij muaji në pikën kufitare të Qafë Thanës, ndërsa gjatë muajit të ardhshëm do të shtrihet edhe në pikën e Bllatës. Nënëshkrimi i marrëveshjes është sot në Dibër nga Ministrat e Brendshëm të të dy vendeve.
Autoritetet vlerësojnë se marrëveshja do të përshpejtojë qarkullimin e qytetarëve dhe transportin e mallrave.
Ministri i Punëve të Brendshme të Shqipërisë, Besfort Lamallari, tha se teksa vendet tona ecin drejt integrimit në BE, kufijtë e humbasin peshën e tyre dhe mbeten thjesht konvencione administrative.
"Kufijtë sot nuk duhen parë si mure ndarëse mes vendeve. Duhet të jenë ura që lidhin, që bashkojnë njerëzit dhe krijojnë sinergjinë e duhur për prosperitet ekonomik e social. Kjo është filozofia që ndërtoi Bashkimin Evropian. Dhe kjo është filozofia që po udhëheq edhe Ballkanin Perëndimor drejt së njëjtës familje europiane. Shqipëria dhe Maqedonia e Veriut nuk po ecin drejt një Evrope pa shtete. Ne ecim drejt një Evrope ku shtetet bashkëpunojnë aq ngushtë, sa kufijtë humbasin peshën e tyre politike dhe mbeten vetëm një konvencion administrativ", tha Lamallari.
Ministri i Brendshëm i Maqedonisë së Veriut, Pançe Toshkovski, deklaroi se sistemi "One Stop", i cili zbatohet edhe në kufijtë me Kosovën dhe Serbinë, do ta bëjë më të lehtë lëvizjen për qytetarët e të dy vendeve, si dhe do të krijojë kushte më të favorshme për bizneset.
