Ish-drejtori i policisë së Shkodrës, Gentian Berberi është përjashtuar nga radhët e Policisë së Shtetit me vendim të Drejtorisë së Standardeve Profesionale. Berberi ishte pezulluar nga detyra pas një incidenti të ndodhur në ambientet e Drejtorisë së Përgjithshme të Policisë së Shtetit. Ai ishte transferuar në sektorin e Analizës, pasi u lirua nga drejtimi i policisë së Shkodrës për shkak të rezultateve të dobëta në luftën kundër kultivimit të kanabisit.
Sipas të dhënave, Berberi është paraqitur në zyrën e drejtoreshës së Burimeve Njerëzore, ku dyshohet se e ka ofenduar dhe kërcënuar gjatë ushtrimit të detyrës, i pakënaqur me pozicionin e ri të punës. Pas ngjarjes, drejtoresha depozitoi kallëzim penal pranë Agjencisë së Mbikëqyrjes Policore.
Menjëherë pas denoncimit, drejtori i Përgjithshëm i Policisë së Shtetit, Skënder Hita urdhëroi pezullimin e Berberit, ndërsa Drejtoria e Standardeve Profesionale nisi hetimin disiplinor. Në përfundim të procedurës u vendos përjashtimi i tij nga Policia e Shtetit, vendim që do të bëhet përfundimtar vetëm pas shqyrtimit nga Komisioni i Apelimit.
