Protesta para Kuvendit këtë të enjte shoqërua me tensione të forta, përplasje fizike, arrestime dhe dhunë të policisë, ndërsa zona përreth parlamentit u kthye në një perimetër të blinduar.
Që në orët e para të mëngjesit, protestuesit u përplasën me forcat e rendit, duke hedhur vezë dhe miell në drejtim të godinës së Kuvendit dhe deputetëve që po hynin në seancën plenare. Për këtë arsye, disa deputetë socialstë janë përpjekur të hyjnë nga hyrje dytësore dhe tretësore të kuvendit duke u fshehur nga protestuesit.
Gjatë përplasjes me policinë, protestuesit shkulën gardhin metalik, ndërsa efektivët u kundërpërgjigjën me spraj dhe gaz lotsjellës për të shpërndarë turmën. Përplasjet vijuan për disa orë dhe sollën arrestimin e disa protestuesve.
Tensioni nuk u kursye as ndaj deputetëve. Përfaqësues të mazhorancës u përpoqën të hynin në Kuvend duke shmangur hyrjet kryesore, madje disa tentuan të kalonin përmes ambienteve të qendrës tregtare pranë Parlamentit për t’iu shmangur protestuesve. Të tjerë u pritën me breshëri vezësh, mielli dhe me thirrje fyese nga turma.
Edhe deputetët e opozitës, që vendosën të bojkotonin seancën parlamentare u përballën me reagimin e protestuesve, të cilët i pritën me thirrjet “Opozitë e shitur”, duke e shtrirë revoltën ndaj gjithë klasës politike.
Paralelisht me tensionet jashtë Kuvendit, Policia zhvilloi ndërhyrje edhe në lokalet përreth Parlamentit. Efektivë të shumtë hynë në ambientet e disa bareve dhe lokaleve në zonë, ku ndaluan dhe shoqëruan protestues që ndodheshin aty, veprim që u shoqërua me kundërshtime dhe akuza për përdorim të forcës.
Pamjet e shpërndara nga vendngjarja tregojnë policë që hyjnë në ambiente private dhe nxjerrin me forcë disa prej protestuesve.
Ndërsa seanca plenare zhvillohej nën masa të jashtëzakonshme sigurie, jashtë Kuvendit protesta vijoi mes përplasjeve me policinë, arrestimeve dhe thirrjeve të vazhdueshme kundër qeverisë dhe Parlamentit.
