Policia e Shkodrës ka parandaluar një atentat të dyshuar ndaj Preng Gjinit, i cili më herët ka qenë objekt i një sulmi me eksploziv në vitin 2020 në Tiranë. Hetimet kanë zbuluar prova që dyshohet se lidhen me përgatitjen e një tjetër sulmi ndaj tij.
Një 38-vjeçar, Euglen Buraku, është arrestuar në flagrancë pasi u kap me lëndë plasëse të pajisur me mekanizëm shpërthimi në distancë. Gjatë kontrolleve, në telefonin e tij u gjet edhe një fotografi e Preng Gjinit, ndërsa ai lëvizte në zonën e Vaut të Dejës me një automjet me targa të dyshuara.
Në kuadër të hetimeve është identifikuar edhe një tjetër person i dyshuar, Eduard Përgjoka, 34 vjeç, i cili është shpallur në kërkim. Në banesën e tij në Rubik janë sekuestruar kapsolla detonatorë, telefona celularë dhe fara kanabisi. Të dy personat po hetohen për vrasje me paramendim të mbetur në tentativë, armëmbajtje pa leje dhe vepra të tjera penale.
