Drejtoria Vendore e Policisë Korçë ka zhvilluar ditën e djeshme një operacion antidrogë në fshatin Lumalas në Korçë. Bëhet me dije se gjatë operacionit është vënë në pranga një person i dyshuar për shpërndarje të lëndëve narkotike.
Policia ka zhvilluar edhe kontrolle në ambientet e një lokali në këtë fshat, ku ka gjetur më shumë se 12 doza lënde narkotike të dyshuara kokainë. Të arrestuarit iu gjet edhe një sasi tjetër në trup, ndërsa dyshohet se lokali përdorej për shitjen e drogës.
Mësohet se gjatë operacionit ka ndodhur edhe një aksident në aksin nacional Korçë-Pogradec, në afërsi të po të njëjtit fshat. Konkretisht dy mjete janë përplasur me njëra-tjetrën, ku si pasojë një prej efektivëve ka mbetur i lënduar dhe një person tjetër.
Efektivi është dëmtuar në këmbë dhe është transportuar drejt Tiranës për mjekim më të specializuar dhe ndodhet jashtë rrezikut për jetën, ndërsa i plagosuri tjetër është dërguar në spitalin e Korçës për ndihmë mjekësore.
