Marcos Llorente ka kritikuar ashpër ministrin spanjoll të Transportit, Óscar Puente, në orët pas përplasjes së ndodhur të mërkurën, më 28 tetor, mes një treni të Renfes dhe një treni të Iryos në Urda, në provincën e Toledos, ku deri më tani janë regjistruar 39 viktima. Mesfushori spanjoll i Atlético Madrid, i njohur më shumë për qëndrimet e tij ekstreme mbi shëndetin dhe mënyrën e jetesës sesa për ndërhyrjet politike, ka shfrytëzuar ndjekësit e tij në rrjetet sociale për të kërkuar përgjegjësi nga ata që drejtojnë transportin.
Aksidenti hekurudhor dhe mesazhi i fortë i Llorentes
Përplasja ndodhi në orën 8:54, në linjën Madrid-Sevilje, me një bilanc paraprak prej 39 viktimash dhe 179 të plagosurish, sipas shërbimeve të emergjencës së Kastiljes-La Mançës. Në vendngjarje vijojnë të punojnë zjarrfikësit e Alcázar de San Juan dhe Orgaz, Mbrojtja Civile, si dhe helikopterët mjekësorë dhe njësitë e kujdesit intensiv. Shkaqet ende nuk janë përcaktuar. Hipoteza aktuale, e cila është larg të qenit një përfundim përfundimtar, sipas burimeve të Ministrisë, lidhet me një gabim të mundshëm njerëzor, që mund të ketë ardhur si pasojë e ndërhyrjes së një punonjësi për të riparuar një defekt në sistemin kryesor të sinjalistikës.
“I dashur Óscar Puente, a nuk ka ardhur koha që ta lini mënjanë Twitter-in dhe të përqendroheni te puna për të cilën ju paguajmë? Kur janë në lojë jetë njerëzish, minimumi që mund t’i kërkohet një ministri të Transportit është përgjegjshmëria, serioziteti, siguria dhe respekti. Jemi lodhur nga politikanët që duken më të interesuar për të fituar debate në rrjetet sociale, si 13-vjeçarë, sesa për të përmbushur përgjegjësitë e tyre. Twitter-i nuk është puna juaj. Puna juaj është transporti publik, siguria dhe marrja e përgjegjësisë kur gjërat shkojnë keq. Deri tani, në këtë drejtim, keni qenë një katastrofë e plotë, por, si gjithmonë, do t’ia hidhni fajin dikujt tjetër. Le të vazhdojë cirku.”
Llorente e shprehu menjëherë zemërimin e tij, ndërsa mesazhi u shpërnda më pas edhe nga futbollistë të tjerë me famë ndërkombëtare, mes tyre Courtois dhe Carvajal. Ai iu drejtua ministrit, duke i kërkuar të linte mënjanë rrjetet sociale dhe t’i përkushtohej punës për të cilën, siç ia kujtoi në mënyrë të ashpër, paguhet nga qytetarët. Llorente thekson se, kur janë në rrezik jetë njerëzish, nga një ministër i Transportit kërkohen përgjegjshmëri, seriozitet dhe siguri, ndërsa akuzon politikanët se ndjekin debatet në internet. Shënjestra e tij nuk është defekti teknik, por stili i komunikimit të një ministri shumë aktiv në rrjetet sociale. Për këtë arsye, mesazhi përbën një kritikë politike, të përmbledhur në një gjykim të prerë dhe negativ për punën e Puentes.
Qëndrimet që e kanë bërë Llorenten një personazh “përçarës”
Llorente ka qenë gjithmonë një rast më vete në futbollin spanjoll, dhe jo vetëm për rezultatet e tij. Bindjet e tij mbi biohakimin dhe mënyrën e jetesës, përfshirë refuzimin e rrezeve ultravjollcë dhe të dritës artificiale, i ka shprehur si në televizion, ashtu edhe në profilet e tij në rrjetet sociale. Nga fotografitë pa krem mbrojtës ndaj diellit gjatë verës së vitit 2024, te ironia për bujën që shkaktoi eklipsi, e deri te teoria e syzeve me lente të verdha dhe të kuqe, e cilësuar si e pabazuar nga disa ekspertë. Si pasojë, siç shkruante gazeta The Telegraph, ai përfundoi duke u konsideruar një “kërcënim për shëndetin publik”, sepse, me rreth tre milionë ndjekës në rrjetet sociale, ka një audiencë të jashtëzakonshme dhe rrezikon të ndikojë te bindjet e njerëzve. Por këtë herë ai e ka përdorur ndikimin e tij për një çështje që nuk e prek personalisht.
Risia e këtij mesazhi të Llorentes qëndron te tema, jo te mënyra se si e ka shprehur. Megjithatë, rëndësia e këtij qëndrimi të tij publik do të matet edhe nga ajo që mund të ndodhë më tej: nëse do të hapë një debat mbi sigurinë hekurudhore apo do të mbetet thjesht një përplasje mes një personazhi publik dhe një politikani. Ajo që është e sigurt, është se mesazhi vjen vetëm pak orë pas aksidentit, ndërkohë që shkaqet ende nuk janë sqaruar dhe kritika përqendrohet kryesisht te sjellja publike e ministrit. Ky i fundit nuk ka dhënë ende asnjë përgjigje.
