Arratia për më shumë se 26 vite e ka shpëtuar nga vuajtja e dënimit në Shqipëri 51-vjeçarin Sokol Hoxha, i ekstraduar nga SHBA në gusht të këtij viti për vrasjen e dy vëllezërve Hektor dhe Ilirjan Banaj në vitin 1997 në Patos.
Megjithatë, Sokol Hoxha do të vijojë të qëndrojë në burg për llogari të autoriteteve belge, ku ndaj tij ka një masë sigurie që prej 8 tetorit. Në Belgjikë, Hoxha është dënuar me burgim të përjetshëm për vrasjen e shqiptares Brunilda Dervishi po në vitin 1997 pasi ishte arratisur nga Shqipëria. Vendimi ka marrë formë të prerë në vitin 2010.
Pas mbërritjes në Shqipëri, ku duhej të vuante dënimin me 25 vite burg, Hoxha kërkoi lirimin me argumentin se dënimi ishte parashkruar dhe Gjykata e Fierit e pranoi kërkesën e tij me një vendim të ditës së sotme. Edhe Prokuroria ishte dakord.
Vendimi i Gjykatës së Fierit është mbështetur në nenin 68 të Kodit Penal, sipas të cilit dënimet me 15 deri në 25 vite burg nuk ekzekutohen nëse kanë kaluar 20 vite nga marrja formë të prerë e vendimit.
Hoxha ishte dënuar në mungesë nga Gjykata e Fierit në vitin 2000, por dënimi nuk ishte ekzekutuar për 26 vite. Me pranimin e kërkesës për parashkrimin e dënimit, 51-vjeçari i ka mbyllur hesapet me drejtësinë shqiptare, pasi ky ishte i vetmi dënim që kishte për të vuajtur në vendin tonë.
Sokol Hoxha u arrestua në Ohio të SHBA-së në muajin maj, pas një arratie prej gati tri dekadash, gjatë së cilës jetonte me identitetin Hysen Gashi. Arrestimi u realizua falë bashkëpunimit të agjencive ligjzbatuese të Shqipërisë, Belgjikës dhe SHBA-së, në kuadër të operacionit “Globi”.
