Spanja mposhti Uruguajin me rezultatin 1-0 dhe siguroi vendin e parë në Grupin H të Botërorit, duke kaluar në fazën e 1/16-ve. Amerikano-jugorët eliminohen kështu në mënyrë befasuese nga turneu. Goli i Alex Baena në minutën e 42-të, por mbi të gjitha gafë e Muslerës në goditjen e tij të pafajshme, vendosën ndeshjen e luftuar që u zhvillua në Guadalajara, duke i dhënë fitoren Spanjës dhe duke dënuar uruguaianët me një eliminim të parakohshëm.
Çmenduria e Canobbios: karton i kuq dhe më pas shtyn arbitrin
Çmenduri nga Agustin Canobbio në sfidën e Botërorit kundër Spanjës, ndeshja e fundit e Grupit H. Futbollisti i Uruguajit kreu një ndërhyrje shumë të rëndë ndaj mbrojtësit spanjoll Cubarsi në minutat shtesë dhe u ndëshkua me karton të kuq nga arbitri. Më pas, Canobbio, tepër i zemëruar, shtyu arbitrin kryesor, Ismail Elfath.
KEPI I GJELBËR-ARABIA SAUDITE 0-0
Në Hjuston, sfida mes Kepit të Gjelbër dhe Arabisë Saudite në Botëror u mbyll pa gola. I dyti në Grupin H pas Spanjës, Kepi i Gjelbër, në pjesëmarrjen e tij të parë në një Botëror, do të përballet me kampionët në fuqi të Argjentinës më 3 korrik. I renditur në vendin e 67-të të renditjes FIFA përpara nisjes së turneut, shteti i vogël ishullor mbeti i pamposhtur në tri ndeshjet e grupit. Spanja, e ndalur në barazimin 0-0 nga Kepi i Gjelbër në ndeshjen e parë, e mbylli grupin me shtatë pikë, ndërsa debutuesit grumbulluan tri pikë dhe Uruguaji e Arabia Saudite nga dy pikë secila.
