Prindërit e Martin Canit kanë reaguar pas deklaratave të kryeministrit Edi Rama në lidhje me tragjedinë që i mori jetën djalit të tyre. Në një deklaratë publike, familja e akuzon kryeministrin se po përdor emrin e Martinit për qëllime politike dhe propagandistike. Ata shtuan se kryeqeveritari shmang përgjegjësinë e institucioneve që, sipas tyre, dështuan ta mbronin. Rama iu referua tragjedisë së Canit gjatë prezantimit të projektit "Smart City" dhe vendosjes së kamerave në 20 shkolla.
“Familja Cani shpreh indinjatën e saj të thellë për mënyrën se si Kryeministri Rama vazhdon të përdorë emrin e djalit tonë, Martin Cani, për qëllime politike dhe propagandistike, duke shmangur përgjegjësitë reale të institucioneve që dështuan ta mbronin.”
Familja kundërshton gjithashtu pretendimin se mbyllja e TikTok ka rritur sigurinë e fëmijëve. Si shembuj, ajo përmend vrasjet e fundit të dy të miturve në Maliq dhe Durrës, duke theksuar se problemi qëndron te mungesa e sigurisë në shkolla dhe dështimet e institucioneve.
“Këto tragjedi tregojnë se rrjetet sociale nuk janë shkaku i vrasjeve, por dështimi i sistemit arsimor, mungesa e sigurisë në shkolla dhe papërgjegjshmëria institucionale.”
Prindërit e Martinit kritikojnë edhe projektin për vendosjen e kamerave në shkolla. Sipas tyre, kamerat nuk zëvendësojnë masat konkrete për parandalimin e dhunës, investimet në siguri dhe mbështetjen psikologjike.
“Siguria në shkolla kërkon veprime, jo pajisje teknologjike për propagandë.”
Familja i përgjigjet edhe deklaratës së Ramës se "mendon vazhdimisht për Martinin", duke thënë se nuk ka pasur asnjë mbështetje apo reagim institucional ndaj tyre. Ajo ngre edhe çështjen e mungesës së pajisjes zemër-mushkëri në Spitalin e Traumës.
“Pse nuk është blerë pajisja e zemrës që do ta shpëtonte Martinin? Martini vdiq sepse: Spitali i Traumës nuk kishte kardiokirurg; Spitali i Traumës nuk kishte pajisjen zemër-mushkëri, që riparon zemrën e të plagosurve në zemër.”
Në fund të reagimit, familja i kërkon kryeministrit të kërkojë përfundimin e hetimeve për përgjegjësinë e shkollës "Fan Noli" dhe të sistemit shëndetësor, duke e cilësuar të papranueshme zvarritjen e procesit.
