Cristiano Ronaldo dhe Portugalia janë gati të bëjnë debutimin e tyre në këtë Botëror 2026. Ndeshja e parë në fazën e grupeve do të luhet kundër Republikës Demokratike të Kongos. Një kundërshtar teorikisht i kalueshëm, por që nuk duhet nënvlerësuar aspak. Në prag të sfidës që do të luhet në Houston të Teksasit, edhe Portugalia iu nënshtrua kontrolleve të rrepta të sigurisë të vendosura në Shtetet e Bashkuara. Mbi të gjithë, Cristiano Ronaldo, fytyra simbol e ekipit, i cili do të përpiqet për herë të fundit të fitojë një Botëror me Portugalinë.
Në një video që është bërë virale në rrjetet sociale është vënë në pah kontrolli i bagazhit të dorës së tij pas mbërritjes në Houston, por edhe kontrolli fizik i kryer ndaj vetë lojtarit. CR7 është në plan të parë, i veshur me një bluzë bezhë me stemën e Portugalisë. Një agjent sigurie (me jelek të verdhë dhe kapele me mbishkrimin “SECURITY”) dhe një tjetër person po e kontrollojnë. Ronaldo duket i qetë, shikon anash dhe hap krahët ndërsa kontrollohet. Për një moment fenomenit portugez i shpëton edhe një e qeshur, por më pas rikthehet menjëherë serioz. Në fakt, Cristiano Ronaldo kishte buzëqeshur ndaj një vajze të vogël që ndodhej përballë tij në pritje për ta përshëndetur ose për të bërë një foto apo selfie me idhullin e saj.
Praktika e kontrolleve ka shkaktuar shumë diskutime në prag të këtij Botërori. Në Shtetet e Bashkuara kanë bërë veçanërisht bujë kontrollet ndaj Senegalit dhe Uzbekistanit, por edhe ndaj Uruguait. Këtë herë i erdhi radha edhe Portugalisë, e grumbulluar në Palm Beach Gardens të Floridës, e cila fluturoi drejt Houstonit për të luajtur ndeshjen e parë të këtij Botërori. Asgjë e pazakontë, pasi bëhet fjalë për protokollin që të gjitha kombëtaret duhet të ndjekin.
Megjithatë, pamja e Cristiano Ronaldos duke u kontrolluar nga agjentët e sigurisë ka bërë shumë zhurmë. Për disa mund të duket e tepruar. Në fakt, kontrollet kryhen edhe sepse, duke qenë se bëhet fjalë për avionë privatë, të cilët jo gjithmonë kontrollohen në nisje me detektorë metali apo nga personeli i sigurisë siç ndodh me fluturimet normale, preferohet që kontrolli të kryhet pikërisht pas mbërritjes në pistën e uljes.
Në rrjetet sociale kjo video është bërë virale sepse shumë tifozë (sidomos arabë dhe portugezë, shën. red.) e konsiderojnë të tepruar ose mungesë respekti ndaj një superylli si Ronaldo. Pamjet bien gjithashtu në kontrast me videot e kombëtareve të tjera që kanë mbërritur në Meksikë, të pritura në mënyrë më festive (sombrero, mariachi etj.). Cristiano Ronaldo respekton qartësisht autoritetet, por bëhet fjalë për një situatë të pazakontë dhe, nëse dëshironi, të pakëndshme, e ndarë nga shumica e futbollistëve që deri më tani janë detyruar t’u nënshtrohen këtyre kontrolleve duke hyrë në Shtetet e Bashkuara vetëm për të luajtur një ndeshje futbolli.
