Polemika, gjithmonë polemika. Teoricienët e konspiracionit në rrjetet sociale shpërthejnë: “Messi u fal!”, “Messi duhej të përjashtohej!”, “Messi nuk duhej ta përfundonte ndeshjen!”. Dhe kështu me radhë, të shoqëruara me foto të ndaluara si prova të “vendimeve” të prerë. “Gjykata e rrjeteve sociale” hyn menjëherë në veprim: Argjentinë-Algjeri përfundon, fenomeni argjentinas ka realizuar një tripletë të jashtëzakonshme, ka shkruar një tjetër faqe historie në futboll, ka barazuar 16 golat e Miro Klose në Botëror, por…
Ja çfarë ndodhi - Episodi që po bën bujë ndodhi pak pas gjysmë ore lojë në Argjentinë-Algjeri, kur Messi kishte realizuar tashmë golin e tij të parë. Në minutën e 31-të, ylli argjentinas ushtron presion dhe në vrull godet nga pas mbrojtësin algjerian Aissa Mandi. Një ndërhyrje e fortë, por sigurisht jo e keqe apo e qëllimshme (mos u mashtroni nga fotografia e ngrirë), me këmbën që godet pulpën e kundërshtarit. Aissa Mandi ngrihet dhe vazhdon ndeshjen, ndërsa për Messin nuk pati asnjë ndëshkim: mund të ishte karton i verdhë? Po. Por të pretendosh më shumë apo të bërtasësh për komplot, jo, kjo jo!
Ndryshe nga arbitri në fushë dhe VAR-i, “gjykata” e pasndeshjes në rrjetet sociale e dha menjëherë vendimin e saj: “Turp”, “Deshën ta falnin”, “Do të kishte qenë një ndeshje krejt ndryshe”. Dhe ndryshe ishte në fakt, me edhe dy gola të tjerë dhe dy mrekulli të tjera të Lionel Messi. Për fat të mirë, shtojmë ne.
Buen partido de Argentina. Pero Messi casi deja en silla de ruedas a un jugador argelino y debió estar en la calle desde el minuto 30. Habría sido un partido completamente distinto.
— gam (@mbafraaude) June 17, 2026
pic.twitter.com/jnK87C6RkH
Pse Messi nuk u përjashtua, çfarë thotë rregullorja
Ndërhyrja nuk u ndëshkua me asnjë masë disiplinore nga arbitri Szymon Marciniak (shpesh i përfshirë në polemika për gabime në të kaluarën) dhe as VAR-i nuk ndërhyri. Messi nuk mori as karton të verdhë, pavarësisht ashpërsisë dhe rrezikshmërisë së ndërhyrjes. Në raste të tilla, qëllimi apo mungesa e qëllimit nuk ka ndikim, pasi sipas rregullores, goditja e Messi-t mund të futej në kategorinë e “forcës së tepruar”, e cila dënohet me masën maksimale, kartonin e kuq. Arbitri polak nuk pa as pakujdesi, duke mos nxjerrë as karton të verdhë. Protestat në rrjetet sociale ishin të shumta, ku shumëkush foli për një lloj “nënshtrimi” ndaj një ylli si Messi.
