Bashkimi Europian po shqyrton kufizime të reja për përdorimin e rrjeteve sociale nga fëmijët dhe adoleshentët. Propozimet përfshijnë kufij moshe, akses të kufizuar ose ndalim të plotë për grupmosha të caktuara. Platforma si Facebook, Instagram dhe TikTok mund të detyrohen të provojnë se shërbimet e tyre janë të sigurta për të miturit përpara se t'u lejojnë aksesin.
Presidentja e Komisionit Europian, Ursula von der Leyen, tha se propozimi ligjor mund të paraqitet pas verës. Ekspertët rekomandojnë ndalimin e ekraneve për fëmijët nën 3 vjeç, përdorim të mbikëqyrur të internetit deri në moshën 13 vjeç dhe kufizime për adoleshentët. Nisma vjen në një kohë kur BE ka rritur presionin ndaj gjigantëve të teknologjisë. Meta dhe TikTok janë vënë së fundmi nën hetim për dizajne që, sipas autoriteteve evropiane, krijojnë varësi te përdoruesit e rinj.
