Policia ka shoqëruar disa persona në komisariat pas atentatit me armë zjarri të ndodhur në Laç, ku mbeti i vrarë 40-vjeçari Ilir Lika. Të shoqëruarit dyshohet se mund të kenë dijeni për rrethanat e ngjarjes dhe po merren në pyetje nga grupi hetimor.
Ndërkohë, policia vijon kontrollet intensive për identifikimin dhe kapjen e autorit ose autorëve. 40-vjeçari u qëllua me armë zjarri pranë banesës së tij dhe nuk arriti t’u mbijetonte plagëve. Nën drejtimin e Prokurorisë, grupi hetimor po administron provat dhe po punon për zbardhjen e plotë të ngjarjes, ndërsa motivet e atentatit mbeten ende të paqarta.
