Protesta kundër qeverisë vijoi edhe në ditën e saj të 56-të, duke mbledhur sërish qindra qytetarë para Kryeministrisë. Protestuesit përsëritën kërkesën për largimin e kryeministrit Edi Rama, qeverisë dhe të klasës së vjetër politike.
Nga podiumi i protestës u njoftua edhe aksioni i radhës. Aktivisti Edison Lika bëri të ditur se qytetarët do të mblidhen të hënën më 27 korrik, përpara Kuvendit, në ditën kur do të zhvillohet seanca parlamentare.
Sipas Likës, fillimisht seanca ishte planifikuar të mbahej më 30 korrik, por shumica e zhvendosi për më 27 korrik.
"Në fillim seanca ishte parashikuar për në datën 30 korrik, por ata e ndryshuan për në datën 27, të hënën. Ne përsëri aty do të jemi," deklaroi ai. Organizatorët kanë bërë të ditur se protestat do të vijojnë çdo ditë, ndërsa të hënën protestuesit pritet të rikthehen para Kuvendit, ashtu si gjatë seancës së fundit parlamentare.
