Protesta qytetare kundër qeverisë hyn sot në ditën e 51-të radhazi, duke vijuar një mobilizim që organizatorët e cilësojnë si më të gjatin e viteve të fundit. Edhe këtë mbrëmje, qytetarët pritet të mblidhen në qendër të Tiranës për të kërkuar dorëheqjen e kryeministrit Edi Rama dhe largimin e qeverisë. Ashtu si çdo ditë, tubimi do të nisë në Sheshin "Skënderbej", për të vijuar me marshimin drejt Kryeministrisë, ku protestuesit mbajnë fjalime dhe më pas përshkojnë rrugët kryesore të kryeqytetit. Kërkesa e tyre mbetet e pandryshuar: dorëheqja e menjëhershme e kryeministrit Edi Rama dhe ndryshimi i klasës politike.
Edhe mbrëmjen e djeshme, në ditën e 50-të të protestës, qindra qytetarë iu bashkuan tubimit, duke marshuar nga Sheshi "Skënderbej" drejt Kryeministrisë. Gjatë protestës u dëgjuan thirrje si "Poshtë patronazhistët", "Edi Rama, jep dorëheqjen", "Parlament analfabet", "Shqipëria kërkon revolucion" dhe "Shqipëri e re". Protestuesit kërkuan gjithashtu hetimin dhe arrestimin e zyrtarëve që, sipas tyre, mbajnë përgjegjësi për korrupsionin në vend, ndërsa gjatë marshimit u dëgjuan edhe thirrje kundër zëvendëskryeministres Belinda Balluku. Prej më shumë se 50 ditësh, protesta zhvillohet çdo mbrëmje me të njëjtin itinerar dhe të njëjtën kërkesë. Organizatorët kanë bërë të qartë se nuk do të tërhiqen dhe se mobilizimi do të vazhdojë deri në plotësimin e kërkesave të tyre, me në krye largimin e kryeministrit Edi Rama.
