Sergej Hasanpapaj dhe Mario Çela janë dërguar në Burgun e Sigurisë së Lartë në Peqin. Ky është një institucion i njohur për masat e forta të sigurisë dhe izolimin e elementëve me rrezikshmëri të lartë.
Një ditë më para ata u ekstraduan nga Belgjika drejt Shqipërisë. Hasanpapaj ishte shpallur në kërkim ndërkombëtar, për vepra penale si tentativë për vrasje, mbajtje pa leje e armëve etj. Ndaj tij Gjykata e Posaçme e Shkallës së Parë për Korrupsionin dhe Krimin e Organizuar kishte caktuar masën e sigurisë “Arrest në burg”.
Ai akuzohet për veprat penale “Vrasja me paramendim”, mbetur në tentativë dhe kryer në kuadër të organizatës kriminale, si dhe “Mbajtja pa leje dhe prodhimi i armëve, armëve shpërthyese dhe i municionit”.
Këtë të premte u ekstradua nga Belgjika edhe Mario Çela. Çela ishte shpallur në kërkim ndërkombëtar, pasi i ishte caktuar masa e sigurisë “Arrest në burg” më 22 nëntor 2024. Bëhet me dije se nga kjo e premte janë shtuar ndjeshëm masat e sigurisë në Peqin. Kjo për shkak të izolimit të elementëve me rrezikshmërinë më të lartë në këtë institucion.
