4 persona janë shpallur në kërkim, ndërsa është arrestuar polici i cili iu kundërpërgjigj me armë zjarri autorëve të atentatit të ndodhur mbrëmjen e djeshme në berberhanen në fshatin Rrilë të Lezhës.
Polici i arrestuar është Besart Kovaçi i akuzuar për shpërdorim të detyrës.
I shpallur në kërkim janë Merando Nikulaj, nipi i Ardian Nikulajt i ekzekuar 3 vite më parë në Shëngjin. I riu gjendej brenda berberhanes dhe që dyshohet se ishte shënjestër e atentatit.
Në kërkim janë edhe 3 persona të tjerë me inicialet G. N., E. N., K. N. që dyshohen se hapën zjarr me breshëri armësh nga jashtë. Ata dyshohen për veprat penale “Vrasje me dashje, e mbetur në tentativë” dhe “Mbajtje pa leje të armëve të zjarrit dhe municionit dhe lëndëve shpërthyese”.
Ngjarja e rëndë ndodhi rreth orës 21:00 të së dielës kur 3 autorët, të cilët lëviznin me një mjet tip Audi qëlluan me breshëri plumba drejt biznesit, duke lënë të plagosur me 3 plumba pronarin e saj Sokol Daci, 30 vjeç, (Foto).
I plagosur mendohet se ka mbetur dhe Merando Nikulaj, i shpallur në kërkim pasi dyshohet se edhe ai ka qëlluar me armë.
Ekspertët e policisë janë rikthyer sërish paraditen e kësaj të hëne në fshatin Rrile, të cilët po marrin gjurmët e gjakut në vendngjarje.
Zyrtarisht për shkak të hetimeve, policia nuk jep të dhëna të tjera. Po analizohen kamerat e banesave dhe bizneseve në zonë, për të parë lëvizjet e automjetit të autorëve para dhe pas ngjarjes, teksa në cilësinë e provës materiale janë sekuestruar rreth 40 gëzhoja automatiku dhe një pistoletë. /LAPSI.al
