Fermerët e Frakullës në Fier, të cilët merren me kultivimin e luleshtrydhes po hasin vështirësi të shumta, duke filluar nga sigurimi i tregut për shitje deri te rënia e çmimit të prodhimit.
Prej një jave çmimi i luleshtrydhes së Frakullës ka pësuar ulje të ndjeshme, ku nga 150 lekë për kilogramë, sot tregtohet me 40 lekë për kilogramë. Fermerët thonë se prodhimi i tyre është brenda parametrave dhe nuk përmban pesticide të dëmshme.
Për shkak të ngërçit në treg fermerët thonë se luleshtrydhet po kalben në serra, ndërsa do të detyrohen të hedhin të gjithë prodhimin në lumë.
Ata pohojnë se ky është viti më i vështirë për kultivuesit e luleshtrydhes, ndërsa të gjendur në prag të falimentit ata kërkojnë ndihmën e institucioneve shtetërore.
