Kryetari i PD-së, Sali Berisha, ishte në qarkun e Shkodrës sot, në turin e takimeve elektorale, duke mbajtur fjalim para mbështetësve në Malësinë e Madhe, ku prezantoi edhe kandidatët për deputetë në zgjedhjet e 11 majit. Gjatë fjalës së tij kryedemokrati u ndal edhe te Ballkani i Hapur. Ai tha se kjo marrëveshja falimentoi fermerin shqiptar. Berisha gjithashtu u premtoi fermerëve në mënyrë absolute se do mbrohen prodhimet e tyre.
"Miqtë e mi, unë u ndala tek prodhimi. Fermeri shqiptar shkoi drejt falimentimit me shpejtësi këto 12 vite, sepse firmosën Ballkanin e Hapur, duke i thënë BE: mos e firmosni. BE është hapësirë e tregtisë së lirë, por tregëti me rregulla. Jo tregtisë që të falimentojë njërin për shkak të tjetrit. Në qoftë se Serbia ka subvencionuar fermerët e saj, minimumi 5 herë më shumë se sa Shqipëria.Normal, që fermeri shqiptar nuk mund të shesë me atë çmim që shet fermeri serb. Dhe ky bënte mashtrimin e kamionit, se kamionit i duhet 1300 vjet në dogana.
Marrëzira! E mbushi tregun me prodhime të Shumadisë, me prodhime të Taxhikistanit, sepse ata janë të lidhur në marrëveshje edhe me Rusinë dhe fermat tona falimentuan njëra pas tjetrës. Ju premtoj fermerëve se në mënyrë absolute prodhimet e tyre sezonale do të mbrohen, dhe vetëm do të mbrohen.", tha Berisha.
