Gjatë komentit për thirrjen e tij në SPAK, kryebashkiaku i Tiranës Erion Veliaj pohoi se kishte aksesuar Regjistrin e Gjendjes Civile për të parë se kush ishte personi i quajtur Nesti Angoni që e kishte denoncuar.
“Personi Nesti Angoni nuk ekziston, por të gjithë e dimë kë përfaqëson ky emër, çfarë mentaliteti përfaqëson, çfarë kulture linçuese përfaqëson ky stil. Megjithatë, pavarësisht se kryetari i bashkisë ka në zotërim të gjithë regjistrin civil dhe mund të verifikojë qartazi se është një kurth i sajuar, kam qenë bashkëpunues”, - u shpreh Veliaj.
Po a ka të drejtë kryetari i Bashkisë të hyjë të shohë të dhënat personale të një qytetari, aq më tepër kur ai është kallëzues i tij?
Gazetari i BIRN, Gjergj Erebara thotë në një koment në rrjetet sociale se edhe kjo deklaratë do mjaftonte për të ngritur një akuzë të re për abuzim me detyrën.
“Interesante shumë që kryetari i bashkisë pranon pa kurrfarë teklifi se ka aksesuar regjistrin civil në kërkim të të dhënave për personin që ka kryer kallëzim për të. Në një situatë tjetër, në një vend normal, kjo deklaratë do të mjaftonte për ngritur një akuzë të re për abuzim me detyrën.
LEXO EDHE: Milionat e Erion Veliajt, politikani që ushqente me supë të varfërit
Kjo tregon gjithashtu se sa shumë respekt kanë socialistët për të dhënat tona personale sa nuk ngurrojnë ta bëjnë publike faktin që shfrytëzojnë, në shkelje të ligjit, asetet shtetërore për hallet e veta dhe vjedhin të dhënat personale, të cilat vijojnë të mbeten pronë private e qytetarit përkatës pavarësisht se grumbullohen nga shteti për qëllime të caktuara speficikisht” – shkruan Erebara. ©LAPSI.al
