Kryetari i Partisë Demokratike Sali Berisha zhvilloi një takim me të rinj të njësisë 5 të Tiranës mbrëmjen e kësaj të enjteje. Ai tha se demokratët janë të bashkuar për të përcjellë “për në banesën e fundit të politikës Erion Veliajn” dhe ku sipas tij do të shkojë edhe Edi Rama në zgjedhjet e ardhshme. Berisha ka edhe një teori sipas të cilit Rama e ka lëshuar Veliajn.
“...dhe në qoftë se Edi Rama e lëshoi Erion Veliajn, e lëshoi për të mbrojtur veten e tij se ai nuk do të pranonte kurrë. Dhe ditët e fundit, kreu aktin e turpshëm për të zhurmuar fundin politik të Erion Veliaj, thirri Belind Këlliçin njeriun që në emër tuaj, në emër të qytetarëve të Tiranës, i bëri pretencën publike Erion Veliajt.
I zbuloi modelin 100% të vjedhjes me 5D, u zbuloi bashkë me deputetë të tjerë të PD, aferën e djegësit, aferë e cila është në vetvete monumenti më i shëmtuar i hajnisë qeveritare ndaj qytetarëve dhe për ta zhurmuar sado pak gozhdimin që ky i bëri Erion Veliajt e thirrën për ta pyetur për shpifjet e Erion Veliajt, për diplomën.
Meqë Erion Veliaj vetë thonë që nuk ka diplomë, edhe Belindi nuk duhet të ketë diplomë, ndërkohë që Belindi ka diplomën më të shkëlqyer të atij universiteti ku ka studiuar” – tha Berisha.
Ai nuk i kurseu akuzat edhe për mediat që sipas tij nuk pasqyrojnë lajmet për opozitën.
“Gjeta që këto media i kishin kushtuar 150 emisione dhe segmente emisionesh shpalljes non grata të Sali Berishës, por nuk i kishin kushtuar asnjë emision 3 rezolutave të cilat nuk ekzistojnë për asnjë shtet tjetër në Europë, si për shtetin shqiptar dhe Shqipërinë” – tha Berisha. ©LAPSI.al
