Na ndajnë pak ditë nga ndërrimi i viteve. Të gjithë po bëhen gati që atë natë të mrekullueshme ta kalojnë nën shoqërinë e familjarëve dhe miqve, dhe sigurisht, tryeza të jetë e shtruar plot. Por jeta nuk është treguar e drejtë me të gjithë. Ka shumë qytetarë, të cilët natën e ndërrimit të viteve e kalojnë vetëm.
Mehmeti është 80 vjeç. Ka dalë për të parë çmimet në tregje dhe më pas për të parë çfarë mund të përballojë xhepi i tij.
“Marrim ndonjë pulë, çfarë do të marr tjetër? E mora shpërblimin, e kisha borxh. Dreq e shejton, çfarë do bëjmë…”-tha pensionisti.
Çdo rrudhë në fytyrën e tij është një dëshmi e vështirësive që ka kaluar në jetë. Festat e fundvitit, prej vitesh tashmë, e kanë humbur magjinë e tyre për Mehmetin.
“Jam vetëm, edhe zonja më ka vdekur. Vështirësi e madhe, sidomos kur vdiq gruaja, kështu e paska jeta… Djali më vdiq në moshën 42 vjeçare. Kam nipin, llogari me vete… Çfarë ndryshimi ka, si zakonisht, vetë bëj ndonjë gjë, blej sot… S’po na merr Zoti, të shpëtojmë”,-tha pensionisti, Mehmet Saliu.
Duken si dy botë paralele, por jo shumë larg njëra-tjetrës. Mehmeti largohet duar bosh, ndërsa të tjerët flasin për përgatitjet e vitit të ri. Sipas një vëzhgimi në tregje, çmimet kryesisht nuk janë rritur dhe pjesa më e madhe e blerësve mund t’i përballojnë. Megjithatë, ata nuk mund të plotësojnë të gjitha nevojat që kanë.
“Mora pensionin dhe mora disa gjëra të vogla. Çfarë do blej, ndonjë bamje, fruta, ndonjë gjë. Lirë, vitin e kaluar nuk ishin shumë të shtrenjta. Kemi blerë një gjel deti.”
“Kemi marrë, në përgjithësi, çmimet sipas vitit, dhe çmimet, ashtu fillon gradualisht tek bujqësia dhe tregtia. Tani rroga ka shkuar lart, çmimet lart.”
Tregtarët tregojnë jashtë kamerave se nuk i kanë rritur çmimet, por ka rënë fuqia blerëse./ Euronews
