Qeveria e Italisë u zotua këtë të hënë të vazhdojë planin e saj të kontestuar për të dërguar azilkërkuesit në qendrat e ndërtuara në Shqipëri. Agjencia e lajmeve "Reuters" citon një deklaratë të qeverisë së Romës se do të punojë me aleatët për ide "inovatore" për të frenuar flukset e emigrantëve të parregullt në Evropë.
Në shkrim sillet në vëmendje se si kryeministrja e djathtë Giorgia Meloni arriti një marrëveshje me homologun e saj Edi Rama vitin e kaluar për të devijuar në vendin ballkanik disa prej emigrantëve që Italia shpëton në det. Skema sipas Melonit do të veprojë si një pengesë kundër nisjeve të emigrantëve nga Afrika.
“Megjithatë, plani fillestar ka hasur në kundërshtimin e gjykatave muajt e fundit. Gjyqtarët ngritën dyshime mbi përputhshmërinë e tij me ligjin e BE-së dhe vendosën që dy grupet e para të emigrantëve të dërguar në këto qendra duhej të transferoheshin në Itali, duke i lënë objektet bosh.
Pasi Meloni u takua me ministrat e saj kryesorë këtë të hënë, zyra e saj tha se ata kishin "përsëritur synimin e vendosur për të vazhduar punën, së bashku me partnerët e BE-së... mbi të ashtuquajturat 'zgjidhje inovative' për fenomenin e migracionit" – citon Reuters.
Vetëm emigrantët meshkuj që vijnë nga një listë e “vendeve të sigurta” të përcaktuara nga qeveria kanë të drejtë të dërgohen në Shqipëri. Ata më pas mund të riatdhesohen më shpejt pas një ekzaminimi të shpejtë dhe në shumicën e rasteve refuzimit të kërkesave të tyre për azil.
Javën e kaluar, Gjykata e Lartë italiane tha se qeveria kishte të drejtë të përcaktonte se cilat vende mund të renditen si “të sigurta për riatdhesim”. Meloni u shpreh se vendimi forcoi bindjen e qeverisë se skema shqiptare do të ecte përpara.
Në takimin e së hënës ajo informoi ministrat për "konsensusin e fortë" mbi nevojën për strategji të reja për të trajtuar imigracionin që u shfaq gjatë një takimi me vendet e tjera të BE-së në Bruksel javën e kaluar, thuhet në deklaratën nga zyra e saj. Fjala e fundit mbi planin italian ka të ngjarë të vijë nga Gjykata e Drejtësisë e BE-së në një vendim që pritet të merret në muajt e ardhshëm. ©LAPSI.al
