Ministri i Jashtëm holandez Caspar Veldkamp njoftoi se vendi i tij do të bllokojë hapat e tjerë të përparimit të Serbisë drejt anëtarësimit në Bashkimin Evropian, duke përmendur disa shqetësime. Politikani ishte në Bruksel për takime me homologët e tij të vendeve të tjera anëtare të BE-së ku bëri vërejtjet e tij.
“Ne shohim se ka progres të pamjaftueshëm në fushën e sundimit të ligjit në Serbi. Në të njëjtën kohë, ne shohim përparim të pamjaftueshëm në marrëdhëniet midis Beogradit dhe Prishtinës" - u tha Veldkamp gazetarëve. "Serbia gjithashtu ka një përgjegjësi të qartë atje. Ne shohim se Serbia ende nuk po e përafron mjaftueshëm politikën e saj të jashtme me politikën e jashtme të BE" – shtoi ai.
Mediat holandeze nënvizojnë se Serbia ende nuk e ka njohur pavarësinë e Kosovës, e cila u shpall në vitin 2008, duke e konsideruar atë si një krahinë autonome. Veldkamp tha se dëshiron të bindë edhe qeveritë e tjera në Evropë që të mbajnë gjithashtu një qëndrim "në mënyrë që Holanda të mos qëndrojë e vetme" - tha ai. “Ne vërtet duam të bëjmë presion mbi Serbinë tani”.
Serbia aplikoi për herë të parë për anëtarësim pothuajse saktësisht 15 vjet më parë dhe vendit iu dha statusi i kandidatit në mars 2012. Negociatat mes BE dhe Serbisë kanë vazhduar për 11 vjet. Veldkamp vuri në dukje se vendet e tjera kandidate anëtare të BE-së kanë bërë një punë më të mirë për të orientuar politikën e tyre të jashtme me atë të BE-së. "Ne presim më shumë hapa nga Serbia në periudhën e ardhshme."
Javën e kaluar, gjatë një debati parlamentar, doli se një gamë e gjerë partish politike holandeze janë kundër hedhjes së hapit të ardhshëm në procesin e pranimit të Serbisë në Bashkimin Evropian në këtë moment.
Deputetja Kati Piri parashtroi një mocion se “procesi i anëtarësimit në BE duhet të bazohet në rezultatet e arritura dhe se sundimi i ligjit është një pjesë e rëndësishme e kësaj”, e cila më tej tha se Serbia ka bërë “progres të pamjaftueshëm” në lidhje me këtë çështje. Mocioni u miratua njëzëri nga dhoma e ulët e Parlamentit. Gjatë debatit, Veldkamp tregoi se ai e konsideron sundimin e ligjit "shumë të rëndësishëm në politikë". ©LAPSI.al
