Dy javë pas kurorëzimit të Komisionit të ri Europian të Ursula von der Leyen rrezikohet që gjithçka të hidhet në erë. Në Bruksel ka mbetur pa zgjidhje ngërçi për emërimet në qeverinë e BE-së. Shkak është bërë kandidatura e ministrit italian Raffaele Fitto i propozuar për zv.President të Komisionit Europian nga radhët e partisë së ekstremit të djathtë të Giorgia Melonit.
Kandidatura e tij nuk ka marrë miratimin e grupit socialist në Parlamentin Europian. Në përpjekje për të zgjidhur mosmarrëveshet, presidentja Ursula von der Leyen u takua mbrëmjen e kësaj të mërkure me krerët e grupeve të EPP-së, Socialistët dhe Renew që përbëjnë dhe koalicionin qeverisës të BE-së. Por takimi ballë për ballë në Palais Berlaymont përfundoi pa dakordësi.
“Nuk ka pasur marrëveshje”, sqarojnë burime parlamentare. “Të gjitha kanalet e komunikimit mbeten të hapura”, shtuan burime nga grupi socialist për mediat italiane. Në mbrëmje, të njëjtat burime nga grupi socialist i BE-së kanë bërë të ditur se “besimi me PPE-në është thyer plotësisht dhe nuk ekziston më. Fitto nuk do të ketë në asnjë rrethanë votat e socialistëve në Komisionin e Çështjeve Rajonale.
Nuk është një çështje spanjolle, as një problem me Italinë apo me Fitton, por një problem me të djathtën ekstreme. Nënkryetarë do të jenë vetëm 5, ata të propozuar nga S&D, Renew dhe EPP. Nëse duan të votojnë Fitton me një shumicë tjetër le ta votojnë atë” – thanë burimet. ©LAPSI.al
