Tre ndeshjet e javës së 10 të Serie A nuk sollën surpriza: fituan favoritët Roma, Lazio e Fiorentina. Dybala nxorri nga taleshat Juric për të mundur 1-0 Torinon. Lazio ishte e pamëshirshme në shtëpinë e Como, duke i dhënë një shuplakë 1-5 Fabregas. Fiorentina triumfon ndaj Genoa, duke u ngjitur në vendin e tretë, në kuotë të barabartë pikësh me bardhekatrit e kryeqytetit.
ROMA 1-0 TORINO
Pas humbjes ndaj Interit dhe disfatës në Firence, Roma rikthehet të fitojë pas një muaji pa fitore dhe ngre kokën. Në javën e dhjetë të Serie A, skuadra e Juric mund 1-0 Torinon dhe arrin kuotën e 13 pikëve në renditje. Në Olimpico, në pjesën e parë, verdhekuqtë dominuan zotërimin e topit, bënë ndeshjen dhe Dybala (20’) zhbllokoi sfidën nga një kënd i vështirë duke përfituar nga një gabim i Linetty. Ky gol mjaftoi për të vendosur ndeshjen. Në pjesën e dytë, skuadra e Torinos u përpoq të reagojë me disa zëvendësime, por vendasit menaxhuan mirë avantazhin dhe siguruan tre pikë të rëndësishme edhe për të ardhmen e Juric në kryeqytet.
COMO 1-5 LAZIO
Java e dhjetë e Serie A konfirmon formën e shkëlqyer të Lazios, që mposhti 5-1 Como. Ekipi i Fabregas humbi disa raste në pjesën e dytë, ndërsa bardhekaltrit ishin të pamëshirshëm edhe kur ishin në njëmbëdhjetë kundër dhjetë. Dygolëshi i Castellanos (27’, 80’) dhe golat e Pedro (32’), Patric (72’) dhe Tchaouna (95’) i sjellin vendin e tretë ekipit të teknikut Baroni, që barazon Atalantën dhe Fiorentinën me 19 pikë. U ndëshkuan me karton të kuq Braunoder (62’) dhe Tavares (66’), i cili ka dhënë 8 asiste në 8 ndeshje.
Lexo më tej: Video/ Amerikanët shpëtojnë Juventus: McKennie e Weah kapin dy herë Parmën: Napoli +7
GENOA 0-1 FIORENTINA
Në javën e dhjetë të Serie A, Fiorentina merr tre pikë të tjera, duke fituar 1-0 në fushën e Genoas. Në pjesën e parë, vjollcët mbajnë gjatë zotërimin e topit, por nuk arrijnë të kalojnë në avantazh. Në pjesën e dytë, goli vendimtar vjen nga Robin Gosens në minutën e 72-të pas një krosimi të Beltran, ndërsa de Gea shpëtoi gjithçka në fund. Toskanët arrijnë 19 pikë, të tretët së bashku me Atalantën e Lazion, duke kaluar mbi Juventus. Gilardino mbetet i fundit me 6 pikë.
