Kapiteni i Kombëtares, Elseid Hysaj, komentoi humbjen 2-0 që kuqezinjtë pësuan në Pragë përballë Çekisë. Pas sfidës, mbrojtësi nga Shkodra shprehu:
“E dinim që ishin më të motivuar se ne, dhe e vërtetuan këtë në fushë me presionin që ushtruan. Çekët janë të fortë në goditjet standarde, dhe aty erdhën golat, përmes krosesh dhe situatash të thjeshta. Duhet të analizojmë gabimet tona dhe t’i shmangim ato në të ardhmen. Patëm mundësinë tonë për ta barazuar apo për ta fituar ndeshjen, por pastaj pësuam golin e dytë që na ndaloi. Ndeshja ndaj Gjeorgjisë është shumë e rëndësishme dhe gjithçka është ende e hapur. Duhet të besojmë më shumë te vetja. Çekia e përgatiti ndeshjen me intensitet, siç do ta bënte me Spanjën. Ata fituan gjithmonë topat e dytë, dhe kjo ishte një nga arsyet që e kishin lojën në dorë. Duhet të pozicionoheshim më mirë në ato situata. Nuk mendoj se kemi rënë, pasi me Ukrainën dhe Gjeorgjinë luajtëm mirë, kjo ishte një lojë e dobët. Gjeorgjia shënoi një supergol, prandaj duhet të kemi besim dhe të mos e humbasim qëndrimin në momentet e vështira. Të mbajmë kokën lartë dhe të vazhdojmë me nivelin që kemi pasur gjatë gjithë këtyre viteve, sepse nëse biem poshtë, do të jetë shumë e vështirë të rikuperohemi,” tha Hysaj për “TV KLAN”.
