Pas hetimeve dhe arrestimeve që tronditën botën e tifozëve ultras, Inter dhe Milan, ndonëse nuk janë zyrtarisht nën hetim dhe konsiderohen si palë të dëmtuara, janë përballur me një procedurë parandaluese nga Prokuroria. Tani, përmes kësaj procedure, ato duhet të tregojnë, në një proces kontradiktor, që kanë shkëputur plotësisht lidhjet me grupet ultras, kryesisht në aspektin e menaxhimit të biletave. Kjo nuk është një çështje e thjeshtë dhe mund të çojë në masa “kufizuese”, por që kanë një qëllim tërësisht “terapeutik” — për të izoluar Inter dhe Milan nga çdo lloj infiltrimi kriminal — deri në atë pikë sa mund të vendoset një administrim gjyqësor mbi disa aspekte të klubit.
Administrimi gjyqësor mund të zbatohet në sektorë të veçantë të klubeve, sipas nenit 34 të dekretit legjislativ 159/2011, kur bizneset akuzohen se, ndonëse nuk kryejnë veprime të paligjshme, përmes neglizhencës apo keqorganizimit të brendshëm, mund të kenë lehtësuar aktivitetet kriminale të personave të dyshuar.
Lexo më tej: Ish-kampioni Maicon i del në mbrojtje Inter: "Vetëm një moment jo, Lautaro do të kthehet i fortë"
Megjithatë, e gjithë kjo nuk ka si synim ndëshkimin e klubeve, por më shumë parandalimin dhe mbrojtjen e tyre. Qëllimi është të shkëputen Inter dhe Milan nga çdo ndikim kriminal dhe t'i kthehen tregut të lirë të “pastruara” nga çdo lidhje e dëmshme. Për momentin, klubet janë të ftuara të marrin masa vetë për të "shëruar" veten duke ndërprerë çdo marrëdhënie të mundshme me grupet e ultrasve, të cilët duket se kanë krijuar një realitet të prishur dhe të rrezikshëm.
