Për herë të parë në historinë e Shqipërisë, në Tiranë do të luhet për titullin kampion Europe në boks, në peshën e rënda në boks. Numërimi mbrapsht ka nisur, në 11 korrik në mbrëmje në sheshin “Skënderbej”, duke nisur nga ora 19:00, do të zhvillohet ndeshja e shumëpritur ndërmjet kampionit Nelson Hysa dhe gjermanit Thorsten Fuchs për titullin WBO.
Interesante është se si Nelson Hysa, ashtu edhe Thorsten Fuchs, vijnë në këtë ndeshje pa asnjë humbje. Rekordi i gjigantit nga Shkodra është 17 fitore në 17 ndeshje në boksin profesionist, prej të cilave 15 me knockout, ndërsa Fuchs ka 13 fitore në 13 takime.
“Pas 24 vitesh, tani kam arritur në kulmin e karrierës sime - tha Hysa -. Luftoj për një titull shumë të rëndësishëm, jam përgatitur shumë për këtë ndeshje. Është një kundërshtar shumë i fortë, por e kam studiuar mirë së bashku me stafin tim, ku bën pjesë trajneri Zef Gjoni, Jetmir Kuçi, i cili është një ndihmë e madhe. Interesi është shumë i madh për këtë ndeshje nga tifozët. Do të ketë shumë shkodranë që do të vijnë në Tiranë e jo vetëm, do të na bashkohen nga e gjithë Shqipëria sepse për herë të parë në histori do të luhet për një titull WBO”, tha Nelson Hysa në prag të ndeshjes.
NË RING EDHE ALBAN BERMETA
Ndeshja e dytë e madhe e mbrëmjes do të jetë për kampionin e Globit. Alban Bermeta me 16 fitore sfidon nigerianin Obinna Joseph me 23 fitore, të gjitha të mbyllura me knockout. Duhet theksuar fakti se këto 2 tituj në një mbrëmje boksi nuk janë zhvilluar kurrë në Ballkan. Në ring do të ngjitet edhe Denis Nurja, kampioni i Ballkanit (15 fitore, 11 me KO) përballë kampionit të Venezuelës Angel Barroso. Gjithashtu në ring do të ngjitet edhe kampioni i shumëfishtë Arjon Kajoshi, pas tij boksieri kampion nga Durrësi, Ardit Murja, i cili do të ketë një kundërshtar shumë të fortë, si dhe talenti Xhuzepe Jaka dhe Fabio Kaciu, e ardhmja e peshave të rënda në Shqiperi (4 ndeshje 4 fitore me KO).
