Një baba dhe djali i tij qëndrojnë pas tentativës së fundit për shantazh ndaj familjes së ish-kampionit të botës në Formula 1, Michael Schumacher, i cili u plagos rëndë në një aksident me ski në vitin 2013. Kjo u raportua nga zyra e prokurorisë gjermane në Wuppertal, e cila po heton rastin. Më parë prokuroria kishte njoftuar vetëm se po hetonte “një rast shantazhi ndaj një personi të famshëm”. Kryeprokurori Wolf-Tilman Baumert tani ka thënë se disa urdhër-arreste janë ekzekutuar në lidhje me akuzat, siç raporton Der Spiegel. Sipas prokurorisë, dy burra të moshës 53 dhe 30 vjeç nga Wuppertal u përpoqën të shantazhonin familjen e Schumacher.
SI U ZBULUAN AUTORËT?
Të dy kanë pretenduar se zotëronin dosje, publikimi i të cilave nuk do të ishte në interes të familjes. Në këmbim ata kishin kërkuar një shumë prej miliona euro, përndryshe të dhënat do të publikoheshin në darknet. Sipas Prokurorisë, autorët e dyshuar të tentativës së shantazhit i kanë dërguar dosje individuale familjes Schumacher për të konfirmuar seriozitetin e kërcënimit të tyre. Gjurmueshmëria teknike e këtyre dosjeve çoi më pas në dyshimin te babai dhe djali i tij. Dy të dyshuarit kryesorë u arrestuan më 19 qershor në parkingun e një supermarketi në Gross-Gerau, Hesse, dhe aktualisht ndodhen në paraburgim. "Nëse shpallen fajtorë, ata rrezikojnë një gjobë ose dënim me burg deri në pesë vjet," tha kryeprokurori i Wuppertal.
Lexo më tej: Martesë në Maiorca për Gina Maria Schumacher: ka dyshime se në dasëm do të jetë edhe Michael
PRECEDENTËT
Kjo nuk është hera e parë që familja Schumacher vihet në shënjestër të kriminelëve. Në vitin 2017, Gjykata e Rrethit Reutlingen dënoi një 25-vjeçar me 21 muaj dënim me kusht, për tentativë shantazhi. Burri i kishte kërkuar gruas së Schumacher 900 mijë euro, nën kërcënimin se mund t'i ndodhte diçka fëmijëve të saj. Muajin e kaluar, familja e Schumacher fitoi një veprim ligjor kundër një botuesi reviste që publikoi një intervistë të krijuar nga AI me ish-kampionin e Formula 1.
