“Patjetër që kam kontestime për penalltinë. Ekipi im e ka fituar ndeshjen. Nuk ishte rezultat i drejtë. Lojtari e ka prekur me dorë topin para se të hyjë në zonë. Edhe ndërhyrja e Hoxhallarit në pjesën e parë ishte penallti për ne". Edlir Tetova tani e ndjen presionin e afrimit të rivalëve, i ndalur për të 6 ndeshje radhazi. E kështu, tekniku i Egnatias shpërthen kundër arbitrit për penalltinë e akorduar në favor të Tiranës në minutën e 95' që i hoqi fitoren nga duart. "Edhe në qoftë se lojtari nuk e ka prekur topin me dorë, lojtari i Tiranës është lidhur te lojtari jonë. E di që është transmetuar ndeshja, por pamja nuk është e mirë".
Tetova është një lumë i fryrë dhe nuk ndal akuzat e tij për arbitrin e ndeshjes Florian Lata: "Më vjen keq për çunat e mi. Më vjen keq për djersën e atyre që derdhin në fushë, edhe të vijnë të ta heqin ndeshjen".
Pastaj për ndeshjen, ai sqaroi: "Kur një ekip rri te ½ e vetë, është shumë e vështirë të rrijë te linja e vetë. Në pjesën e dytë ndryshuam mënyrën e manovrës së presingut. Edhe ata e kishin përgatitur shumë mirë ndeshjen dhe nuk donin ta humbnin”, u shpreh Tetova.
FAGU: "BARAZIMI ISHTE REZULTATI MË I DREJTË"
“Ashtu si u zhvillua ndeshja ne kishim më shumë epërsi dhe nuk lamë shumë hapërsira, përveç momentit të golit. Ishte gabimi i vetëm në këtë ndeshje dhe u ndëshkuam. Nuk pashë një rënie fizike e kishim në kontroll ndeshjen. Një moment ishte ai dhe luanim kundër Egnatias që është në vendin e parë dhe ka kualitet. Barazimi ishte rezultati më i drejtë për mua". Erbim Fagu nuk ka fituar asnjë ndeshje që kur është ulur në pankinën e Tiranës, por vazhdon të presë kthesën e të tijve që nuk po vjen.
Lexo më tej: Video/ Tirana hap lojën për vendin e parë: penalltia e dyshimtë e Abazajt në të 97' i heq Egnatias fitoren
Sidoqoftë, një pikë kundër kryesuesve, për më tepër si erdhën gjërat, ngjan me shumë rëndësi: "Pishmanllëk vetëm 3 pikët, asgjë tjetër. Çunat kanë bërë maksimumin vetëm duhet të ishin pak më të qetë në momentin e fundit kur dilnin në zonën e Egnatias. Ditën e hënë ose të martën mund të kthehet Najdovski. Meta është në fazë rikuperimi dhe pjesa tjetër është ok”, e mbylli tekniku bardheblu.
