“Kemi shpërdoruar shumë në atë moment kur duhej të mbyllnim ndeshjen. Kjo fillon duke i dhënë zemër kundërshtarit, më vjen keq që hymë në presion duke humbur rastet ne”. Orges Shehi nuk e fsheh zhgënjimin se humbi një ndeshjetë cilën mund ta kishte fituar madje me goleadë. Tekniku i të kuqve, në humbjen e parë në pankinën e të kuqve nuk kërkon alibi mungesah: “Të qajmë mungesat mendoj se është e pavend, nuk do rri të qaj mungoi ky e ai. Ne kishim ndeshjen në dorë, duke kontrolluar shumicën. Për këtë të vjen keq, kur ke shumë raste para portës, që të humbasësh ndeshjen”.
Tekniku analizon sjelljen e skuadrës së tij dhe rezervat i ka me ata që u futën nga pankinë, që nuk bënë asgjë për të ndryshuar lojën. Në fakt, Skuka, Keko e Mehmeti ishin nën ton: “E thashë që në fillim që do shkonte situata ndryshe nëse shënon. Duam të dalim e finalizojmë, pastaj hyn edhe pak presioni, hyn në presion duke humbur raste dhe pastaj sigurisht që ato që lojtarët që futen duhet të ndryshojnë marshin apo të ketë egërsi më shumë”.
Lexo më tej: Video/ Tresa përmbys Partizanin në të 96': Laçi hakmerret ndaj të kuqve për dy humbjet e pësuara në shtesë
Në fund kostatimi: “Unë mendoj se pësuam dhe humbëm ndeshjen nga butësia jonë dhe presioni që hymë nga shpërdorimi që e përmend disa herë por nuk është justifikim. Na mbetet shumë punë për të bërë, konfiguruar skuadrën në fazë sulmi, që të mos biem poshtë 80% tonë e të mos lëshojmë në fazën mbrojtëse” e mbylli Shehi.
JOSA: “PARTIZANI MUND TA VRISTE LOJËN”
“Kishim momente të këqija në lojë, pas pësimit të golit nga pozicioni standard. Në përgjithësi nuk duhet ta kthenim topin prapa, që Partizani të na presonte prapa. Edhe në të dytën nuk e nisëm mirë, ku Partizani mund ta vriste lojën”. Mirel Josa është i kënaqur për fitoren me përmbysje ndaj të kuqve. Në fund të fundit, tekniku i ktheu reston për dy humbjet në dy fazat e para, pikërisht në shtesë: “Qëlloi që fituam në këtë mënyrë, por në fazën e parë kemi humbur në këtë mënyrë. Gjëra që ndodhin e kompensohet, por i jep besim ekipit për vazhdimësinë”.
