Dëmtimet te Milan janë kthyer në një problem serioz që nuk mund të anashkalohet më. Që nga fillimi i kampionatit, kuqezinjtë kanë raportuar 25 dëmtime, 18 prej të cilave janë muskulare. Mesatarisht një në çdo tre ditë dhe vetëm tetë lojtarë nuk janë dëmtuar deri më tani. Por kush e ka fajin? Nga Franca e drejtojnë gishtin nga Milan Lab.
ÇFARË ËSHTË MILAN LAB?
Portali i njohur francez 'So Foot' identifikon Milan Lab si përgjegjësin kryesor për këtë problem dëmtimesh: “I shpallur si pararendës i mjekësisë sportive në fillim të viteve 2000, kjo qendër kërkimore sot rezulton joefektive”. Në fakt, kur u themelua në vitin 2002 me një kosto prej 2.5 milionë euro nga Silvio Berlusconi, Milan Lab kishte për qëllim optimizimin e psikofizikës së sportistëve. Por mbi të gjitha, synonte parandalimin e dëmtimeve përmes metodave që varionin nga ushqimi te përgatitja atletike.
MILAN LAB NUK FUNKSIONION ME TË RINJTË
Ky laborator i lejon Milan të rekrutojë lojtarë më të vjetër dhe për këtë arsye të minimizojë kostot, duke marrë rezultate bindëse sportive. Një metodë që do të frymëzonte edhe klube të tjera si Manchester United, Chelsea, Boca Juniors por do të shtrihej edhe në sporte të tjera si basketbolli me San Antonio Spurs, futbolli amerikan me Miami Dolphins apo edhe F1 me McLaren. Ndërsa metodat bëjnë mrekulli për lojtarët më të vjetër, ato rezultojnë më pak efektive për lojtarët më të rinj.
Pra, nëse nga njëra anë Milan Lab ka lejuar disa lojtarë ekspertë të zgjasin karrierën e tyre, nga ana tjetër ka shkaktuar probleme të ndryshme për të rinjtë që kanë veshur dhe veshin fanellën e kuqezinjve: nga Pato te El Shaarawy, duke kaluar nga Bonaventura e Montolivo. Sipas So Foot, sot më shumë se kurrë, me një skuadër që është mesatarisht më e re se 20 vjet më parë, "metoda e Milan Lab" është shkaku kryesor i shumë dëmtimeve. A është e vërtetë kjo teori? Sigurisht që ka një problem dhe duhet zgjidhur sa më parë.
