Një tjetër ndeshje e kombëtares është ndërprerë për shkak të kushteve atmosferike. Takimi i kombëtares kuqezi U-21 në transfertën e Malit të Zi, e vlefshme për kualifikueset e Euro U-21, është ndërprerë në minutën e 27-të për shkak të reshjeve të dendura të shiut në Podgoricë.
Arbitri kryesor i ndeshjes thirri skuadrat në dhomat e zhveshjes dhe pas 30 minutash u rikthye në fushë për të testuar kushtet e terrenit. Në fakt, ishte e pamundur që ndeshja të rifillonte dhe bashkë me delegatin e UEFA-s u vendos për ndërprerjen përfundimtare të takimit.
UEFA, ndërkohë, ka vendosur që ndeshja mes Shqipërisë U21 dhe Malit të Zi U21 të luhet më 7 qershor 2024. Sfida do të rinisë nga minuta e 27', kohë kur u ndërpre. Sipas kalendarit të datave zyrtare të FIFA-s e UEFA-s për Kombëtaret ndeshja nuk mund të shtyhej për nesër. E angazhimet e lojtarëve me klubet e tyre e bënë të pamundur që kjo sfidë të zhvillohet në një datë më të afërt.
Lexo më tej: Goditje e fortë për Kombëtaren U-21: Selimaj dëmtohet, Bushi thërret qendrorin e Laçit
Shqipëria U21 do të luaj në marsin e vitit 2024 dy sfida kualifikuese ndaj Finlandës dhe Zvicrës. Edicioni kualifikues do të ulë siparin në qershorin e vitit 2024 dhe Shqipëria U21 ka në program sfidat ndaj Zvicrës, Armenisë dhe takimin e shtyrë ndaj Malit të Zi.
